Dä Mömmesfresser

Dä Mömmesfresser

Wä immer Angs hät öm sing Flocke,
deit nor op singe Nüsele hocke
un dobei su kniestich es,
dat hä sing eije‘ Mömmese fress
weed Mömmesfresser he jenannt
un es me’m Schruppsüffer verwandt.

Wann die zwei ens jon zo ’nem Weet,
dat ’ne drüjje Ovend weed:
Dä eine waad, dat wä bestellt,
dä and’re setz op singem Jeld.
Un su sin se en der Klemm,
wann em Weetshuus an der Schwemm
die zwei dun kritisch sich beloore:
Dat eetste Kölschh kann janz schön doore.

Wann einer dann no’m Avtredd jeiht,
dä and’re flöck bestelle deit
un schött sich ielich ex un hopp
dat jode Züch – zack – en dä Kopp
un stellt dat Jlas dann op dä Threse,
su, als wör niemols jet jewäse.

Drei Stunde un vier Schröm dann drop,
do maache sich die zwei dann op
un mer sich aadich sage deit:
„Nä, wat en staats Jesellichkeit!“
Un jonn dann met ener drüjjen Stross
zom Avsacker zo sich noh Huus.