Chressdäch en Kölle

Chressdäch en Kölle

De Chressdäch röcke immer nöher
janz Kölle litt em Kääzesching.
Mer denk bei sich: „Et es wie fröher.
Su stell un leis, su höösch un fing.“

Op jedem Plaatz ’ne Weihnachtsmaat,
met Bredderbude es
janz Köln verbaut. Mer hät jemaht
’ne Einheitsweihnachtsdress.

Bläck Fööss höört mer, Höhner, Brings.
Dä Weihnachtsmann deit winke.
Un üverall do Lückcher fingks,
die sich dozo bedrinke.

Wann stäänevoll drop en der Soot
all Lampe se han an,
dann kündich sich met frohem Mot
dä Fasteleer ald an.